របាយការណ៍ស៊ើបអង្កេត៖ ការដឹកនាំរបស់លោក ចិន ជឺ ធ្វើឲ្យ Prince Group អាចរកចំណូលបាន ៣០លានដុល្លារ ឬច្រើនជាងនេះ ក្នុង​ ១ថ្ងៃ

អាមេរិក៖ ប្រភពសារព័ត៌មានអន្តរជាតិបានរាយការណ៍ថា ក្រុមហ៊ុន Prince Group ដែលដឹកនាំដោយលោក ចិន ជឺ (Chen Zhi) អាចរកចំណូលបានរហូតដល់ ប្រមាណ ៣០ លានដុល្លារអាមេរិកក្នុងមួយថ្ងៃ ពាក់ព័ន្ធនឹងប្រតិបត្តិការអាជីវកម្ម និងសកម្មភាពហិរញ្ញវត្ថុឆ្លងដែន ដែលកំពុងស្ថិតក្រោមការស៊ើបអង្កេតពីអាជ្ញាធរអន្តរជាតិ។

យោងតាមឯកសារស៊ើបអង្កេតរបស់សារព័ត៌មាន Fox Business ចេញផ្សាយកាលពីខែតុលា ឆ្នាំ ២០២៥ និងរបាយការណ៍របស់ប្រព័ន្ធផ្សព្វផ្សាយបរទេសផ្សេងទៀតបានអះអាងថា ក្រុមហ៊ុន Prince Group  បានចូលរួមក្នុងបណ្តាញក្លែងបន្លំតាមអ៊ីនធឺណិត និងការលាងលុយកខ្វក់ ដែលបានបង្កើតប្រាក់ចំណូលយ៉ាងច្រើនក្នុងរយៈពេលខ្លី។ ប្រភពដដែលបានបញ្ជាក់ថា ប្រាក់ចំណូលប្រចាំថ្ងៃរបស់ក្រុមនេះ អាចឈានដល់ ៣០ លានដុល្លារអាមេរិកក្នុងមួយថ្ងៃ ឬច្រើនជាងនេះ ដោយសារការប្រតិបត្តិការតាមបណ្តាញឌីជីថល និងសកម្មភាពហិរញ្ញវត្ថុស្មុគស្មាញ។

ក្នុងរបាយការណ៍អន្តរជាតិមួយចំនួន បានលើកឡើងថា Prince Group ត្រូវបានសង្ស័យថា ពាក់ព័ន្ធនឹងការបោកប្រាស់តាមអ៊ីនធឺណិតប្រភេទ “pig-butchering scam” និងសកម្មភាពក្លែងបន្លំផ្សេងៗ ដែលមានជនរងគ្រោះនៅក្នុងប្រទេសជាច្រើន។ សកម្មភាពទាំងនេះ ត្រូវបានអះអាងថា ជាមូលហេតុសំខាន់នាំឱ្យក្រុមហ៊ុនអាចរកប្រាក់ចំណូលបានក្នុងចំនួនដ៏ធំ។

ទោះជាយ៉ាងណា កន្លងមក ក្រុមហ៊ុន Prince Group ធ្លាប់ចេញសេចក្តីថ្លែងការណ៍បដិសេធការចោទប្រកាន់ទាំងនេះ ដោយអះអាងថា អាជីវកម្មរបស់ខ្លួនប្រតិបត្តិទៅតាមច្បាប់ និងមិនពាក់ព័ន្ធនឹងសកម្មភាពក្លែងបន្លំឡើយ។ ប៉ុន្តែអាជ្ញាធរអន្តរជាតិ និងស្ថាប័នស៊ើបអង្កេតនៅតែបន្តតាមដាន និងពិនិត្យសកម្មភាពរបស់ក្រុមហ៊ុននេះយ៉ាងជិតស្និទ្ធ។

បច្ចុប្បន្ន ករណីនេះកំពុងទាក់ទាញការចាប់អារម្មណ៍យ៉ាងខ្លាំងពីសាធារណជន និងសហគមន៍អន្តរជាតិ ខណៈដែលលទ្ធផលស៊ើបអង្កេត និងការកាត់ទោសនាពេលខាងមុខ អាចមានផលប៉ះពាល់ធំធេងដល់វិស័យហិរញ្ញវត្ថុ និងការប្រឆាំងអំពើបោកប្រាស់ឆ្លងដែននៅក្នុងតំបន់។

ប្រភព៖ Fox Business