ប្រធានាធិបតីចិនលោក ស៊ី ជីនពីង នា​ថ្ងៃព្រហស្បតិ៍​ទី​៣០​ខែ​តុលា​ឆ្នាំ​២០២៥​នេះ បានសរសើរសមភាគី​អាមេរិក ដូណាល់ ត្រាំ សម្រាប់«ការរួមចំណែកដ៏ធំធេងក្នុងការសម្រេច​បាន​នូវ​កិច្ចព្រមព្រៀងបទឈប់បាញ់​ហ្គាហ្សានាពេលថ្មីៗនេះ»

យោង​តាម CNN ថ្លែងនៅ​កិច្ចប្រជុំ​ជាមួយលោកត្រាំ​នៅក្នុងប្រទេសកូរ៉េខាងត្បូង លោកស៊ី បាននិយាយថា លោកកោតសរសើរចំពោះកិច្ចខិតខំប្រឹងប្រែងការទូតនាពេលថ្មីៗនេះរបស់មេដឹកនាំសហរដ្ឋអាមេរិក ក្នុងការជួយលុបបំបាត់ភាពតានតឹងអន្តរជាតិ និងគាំទ្រការផ្សះផ្សាក្នុងតំបន់។ លោកស៊ី​បាន​លើក​ឡើង​ថា «ការចូលរួមក្នុងន័យស្ថាបនារបស់ប្រធានាធិបតីត្រាំ បាននាំមកនូវសន្ទុះវិជ្ជមានដល់ដំណើរការសន្តិភាពដ៏លំបាក។ ការរួមចំណែកនាពេលថ្មីៗនេះរបស់គាត់ក្នុងការបញ្ចប់ជម្លោះនៅតំបន់ហ្គាហ្សា និងវត្តមានរបស់គាត់នៅឯការចុះហត្ថលេខាសន្តិភាពកម្ពុជា-ថៃ ឆ្លុះបញ្ចាំងពីការប្តេជ្ញាចិត្តចំពោះសន្តិភាពដែលពិភពលោកត្រូវការ»។

មេដឹកនាំចិនបានកត់សម្គាល់ថា ទោះបីជាទីក្រុងប៉េកាំង និងទីក្រុងវ៉ាស៊ីនតោន មានភាពខុសប្លែកគ្នាញឹកញាប់លើបញ្ហានយោបាយ និងសេដ្ឋកិច្ចក៏ដោយ កិច្ចសហប្រតិបត្តិការរវាងមហាអំណាចទាំងពីរនៅតែមានសារៈសំខាន់។ លោកស៊ីបានបញ្ជាក់​ថា «ដោយសារលក្ខខណ្ឌជាតិផ្សេងគ្នារបស់យើង យើងមិនតែងតែចុះ​សម្រុង​គ្នា​ទេ ហើយវាជារឿងធម្មតាសម្រាប់ប្រទេសសេដ្ឋកិច្ចឈានមុខគេទាំងពីរដែលមានការប៉ះទង្គិចគ្នានាពេលឥឡូវនេះ និងអនាគត។ ប៉ុន្តែយើងត្រូវតែរក្សាផ្លូវត្រូវ និងធានា​ឲ្យ​មានការដើរទៅមុខប្រកបដោយស្ថិរភាពនៃកប៉ាល់យក្សនៃទំនាក់ទំនងចិន-អាមេរិក»។

លោកស៊ី បានបន្ថែមថា ការអភិវឌ្ឍ​របស់ប្រទេសចិន«ដើរទន្ទឹមគ្នា»ជាមួយនឹងចក្ខុវិស័យរបស់លោកត្រាំ ដើម្បី«ធ្វើ​ឲ្យ​អាមេរិកអស្ចារ្យម្តងទៀត» ដោយសង្កត់ធ្ងន់ថា ប្រទេសទាំងពីរគួរតែដើរតួជា«ដៃគូ និង​មិត្ត» ជាជាងគូប្រជែង។ លោកស៊ី បាន​ប្រាប់​ថា «ប៉ុន្មានឆ្នាំមកនេះ ខ្ញុំបាននិយាយជាសាធារណៈជាច្រើនដងថា ប្រទេសចិន និងសហរដ្ឋអាមេរិក គួរតែជាដៃគូ និងជាមិត្ត។ នេះ​ជា​អ្វី​ដែល​ប្រវត្តិសាស្ត្រ​បាន​បង្រៀន​យើង និង​អ្វី​ដែល​តម្រូវ​​ឲ្យ​​មាន​ការ​ពិត»។

ជំនួបរវាងលោកស៊ី និង​លោក​ត្រាំ ធ្វើឡើងចំពេលមានការយកចិត្តទុកដាក់ជាសកលចំពោះរបៀបវារៈការទូតរបស់ពួកគេ ខណៈដែលមេដឹកនាំទាំងពីរស្វែងរកតុល្យភាពនៃការប្រកួតប្រជែងជាមួយនឹងកិច្ចសហប្រតិបត្តិការលើបញ្ហាអន្តរជាតិសំខាន់ៗ​រាប់​ចាប់ពីពាណិជ្ជកម្មរហូតដល់សន្តិសុខក្នុងតំបន់៕

ប្រភព៖ CNN