អតីតមេភូមិភាគថៃនឹងត្រូវកោះហៅទៅព្រឹទ្ធសភា ដើម្បីបំភ្លឺរឿងដែលបានផ្គើនបញ្ជារដ្ឋាភិបាល

 

Boonsin Padklang អតីតមេភូមិភាគថៃនឹងត្រូវកោះហៅទៅព្រឹទ្ធសភា ដើម្បីបំភ្លឺរឿងដែលអតីតមេភូមិភាគ២ថៃរូបនេះ អះអាងថាបានផ្គើនបញ្ជារដ្ឋាភិបាល ឲ្យឈប់បាញ់ក្រោយការផ្ទុះអាវុធជាមួយកម្ពុជានៅព្រំដែន បាន៦ម៉ោង។

តាមការផ្សាយរបស់ The Nation កាលពីថ្ងៃចន្ទទី១០ខែវិច្ឆិកា, គណៈកម្មាធិការព្រឹទ្ធសភាទទួលបន្ទុកកិច្ចការយោធានិងសន្តិសុខរដ្ឋ ដែលមានលោក Sawat Tassana ជាប្រធាន បាននិយាយថា៖ «គណៈកម្មាធិការ បានសម្រេចអញ្ជើញ Boonsin Padklang ឲ្យចូលរួមក្នុងកិច្ចប្រជុំមួយនៅថ្ងៃអង្គារទី១១ខែវិច្ឆិកា ដើម្បីបំភ្លឺនិងផ្លាស់ប្តូរទស្សនៈលើស្ថានភាពព្រំដែនថៃ-កម្ពុជា»។

កាលពីថ្ងៃអាទិត្យ Boonsin បានសារភាពថា ខ្លួនពិតជាមិនស្តាប់តាមបញ្ជារបស់រដ្ឋាភិបាលទីក្រុងបាងកក ដែលឲ្យឈប់បាញ់មែន ពេលជម្លោះព្រំដែនជាមួយកម្ពុជាឈានដល់ការផ្ទុះអាវុធកាលពីខែកក្កដា។

ថ្លែងនៅខេត្ត Nakhon Pathom, បុរសដែលបើកការឈ្លានពានកម្ពុជារូបនេះនិយាយថា លោកផ្ទាល់ជាអ្នកបដិសេធស្តាប់តាមបញ្ជារបស់រដ្ឋដែលឲ្យភូមិភាគ២ ត្រូវបញ្ឈប់ការប្រយុទ្ធ ដោយសារតែខ្លួនឯងចង់បានទឹកដី។

ទោះបីជាយ៉ាងណាក៏ដោយ ក្រោយមកមិនបានប៉ុន្មានផង ជនល្មោភសង្គ្រាមនិងក្រឡិចក្រឡុចម្នាក់នេះ បែរជាក្រឡាស់សម្តីវិញដោយនិយាយថា ខ្លួនមិនទទួលបញ្ជាពីនរណាឡើយ ហើយប្រាប់ទៅពលរដ្ឋថៃថា កុំគិតពីអតីតកាលទៀតអី៕

ប្រភព៖ The Nation