ស្ថាប័នជំនាញលើវិស័យបុរាណវិទ្យា និងបុរេប្រវតិ្តវិទ្យា ទទួលការបណ្តុះបណ្តាលបច្ចេកវិទ្យាបរមាណូ សម្រាប់ការអភិរក្សគាំពារសម្បត្តិវប្បធម៌

 ភ្នំពេញ៖ ស្ថាប័នជំនាញលើវិស័យបុរាណវិទ្យា និងបុរេប្រវតិ្តវិទ្យា នៃក្រសួងវប្បធម៌​ និងវិចិត្រសិល្បៈ ទទួលឧបករណ៍ Leica Scan Station P40 / P30 3D Laser និងការបណ្តុះបណ្តាលបច្ចេកវិទ្យាបរមាណូ សម្រាប់ការអភិរក្សគាំពារសម្បត្តិវប្បធម៌។

លោក ឡេង វិទូ ប្រធានស្តីទីនាយកដ្ឋានបុរាណវិទ្យា និងបុរេប្រវត្តិវិទ្យា ​តាមរយៈព័ត៌មាន នាថ្ងៃនេះថា ​អគ្គនាយកដ្ឋានបេតិកភណ្ឌ​ នៃក្រសួងវប្បធម៌ ​និងវិចិត្រសិល្បៈទទួលបានគម្រោង TC Project: KAM1002 ស្តីពីការគាំពារ ​និងអភិរក្សសម្បត្តិវប្បធម៌ពីស្ថាប័នទីភ្នាក់ងារថាមពលបរមាណូ​អន្តរជាតិ(IAEA) រយៈពេល៤ឆ្នាំ​ គឺចាប់តាំងពីឆ្នាំ២០២០ រហូតដល់ឆ្នាំ២០២៤ ដែលមានរូបលោក ជាមន្រ្តីអនុវត្តគម្រោង។

គម្រោងនេះគឺផ្តោតសំខាន់ទៅលើការបណ្តុះបណ្តាលមន្ត្រី ឱ្យមានលទ្ធភាពក្នុងការប្រើប្រាស់​បច្ចេកវិទ្យា​បរមាណូ​សម្រាប់ការអភិរក្ស​គាំពារសម្បត្តិវប្បធម៌​ តាម​រយៈការ​បញ្ជូន​ទៅទទួល​បណ្តុះ​បណ្តាល​និងទស្សនកិច្ចសិក្សារយៈពេលខ្លីនៅក្រៅប្រទេស​ ជាពិសេសទទួលបានឧបករណ៍​មួយ​ចំនួនសម្រាប់ប្រើក្នុងការវិភាគ​ ជួសជុល ​និងអភិរក្សបេតិកភណ្ឌវប្បធម៌ជាតិ។

ក្នុងនោះមន្រី្តយើងចំនួន០២រូប នឹងត្រូវទៅបណ្តុះបណ្តាលនៅប្រទេសប៉ូឡូញ(Poland) រយៈពេល១ខែ ក្នុងកិច្ចការងារអភិរក្ស និងជួសជុលគំនូរ ហើយនិងវត្ថុដែលផលិតពីក្រណាត់ និងមន្រី្តចំនួន២រូបទៀត ត្រូវទៅបណ្តុះបណ្តាលនៅសហរដ្ឋអាមេរិក(USA) រយៈពេល៣ខែ ក្នុងការងារវិភាគ ​និងពិសោធន៍វត្ថុសិល្បៈ និងមន្រី្តចំនួន២រូបទៀត និងត្រូវទៅទស្សនកិច្ចរយៈពេលខ្លី នៅប្រទេសបារាំង(France) រយៈពេល១សប្តាហ៍។ ចំពោះឧបករណ៍វិញ យើងបានស្នើសុំ​ទៅទីភ្នាក់ងារ​ថាមពលបរម៉ាណូអន្តរជាតិ(IAEA) ទន្ទឹមនឹងនោះភាគីខាង IAEA ក៏បានផ្តល់ជូន​យើងផងដែរ។ ឧបករណ៍ទាំងនោះទៀតសោតភាគច្រើន ដែលយើងស្នើសុំ គឺទាក់ទង និងការ​ជួសជុល អភិរក្សវត្ថុសិល្បៈ ក្នុងនោះមានម៉ាស៊ីនម៉ាយក្រូស្កុប(Microscope) ​ម៉ាស៊ីនលាយកាវ ម៉ាស៊ីនដកជាតិអំបិល និងម៉ាស៊ីនវាស់PH ព្រមទាំងម៉ាស៊ីនមួយចំនួនទៀត ដែលទីភ្នាក់ងារ​ថាមពលបរម៉ាណូអន្តរជាតិ បានផ្តល់ឲ្យនាយកដ្ឋានបុរាណវិទ្យានិងបុរេប្រវត្តិវិទ្យា។

លោក ឡេង វិទូ បានបញ្ជាក់ទៀតថា ​នាយកដ្ឋានបុរាណវិទ្យានិងបុរេប្រវត្តិវិទ្យា បាន​ទទួលឧបករណ៍ Leica Scan Station P40 / P30 3D Laser ពីស្ថាប័នទីភ្នាក់ងារថាមពល​បរមាណូអន្តរជាតិ(IAEA) និងមានមន្រ្តីចំនួន៦រូប ទទួលបានការបណ្ដុះបណ្ដាលនៃការប្រើប្រាស់ឧបករណ៍នេះ ​ពីអ្នកជំនាញមកពីក្រុមហ៊ុន Leica។ ការបណ្តុះបណ្តាល​ នេះមានរយ:ពេល១ថ្ងៃពេញ ​ដោយបានធ្វើការណែនាំ អនុវត្តន៍ការប្រើប្រាស់​នៅទីតាំងសារមន្ទីរជាតិផ្ទាល់ ​និងធ្វើការបម្លែង​ កែសម្រួលទិន្នន័យនៅទីស្តីការក្រសួងវប្បធម៌ និងវិចិត្រសិល្ប:៕អត្ថបទ រដ្ឋា