តុលាការសម្រេចចោទប្រកាន់មេឃុំព្រែកខ្សាច់ និងបក្ខពួក២នាក់ពាក់ព័ន្ធនឹងអំពើឆបោកអនឡាញ

នៅថ្ងៃទី១៨ ខែកញ្ញា តំណាងអយ្យការអមសាលាដំបូងរាជធានីភ្នំពេញ បានសម្រេចចោទប្រកាន់លោក រៀម រុំ មេឃុំព្រែកខ្សាច់ និងបក្ខពួក ២នាក់ទៀត ក្រោយសង្ស័យថា បានទទួលសំណូកពីជនជាតិចិនប្រមាណ ៨០០០ពាន់ដុល្លារ និងបានរៀបចំទីតាំងដីរបស់ខ្លួនធ្វើជាកន្លែងឆបោកអនឡាញ។ ក្នុងសេចក្តីប្រកាសព័ត៌មានរបស់តំណាងអយ្យការ បុគ្គលទាំង​ ៣នាក់នេះកំពុងរងបទចោទម្នាក់ៗ ៣បទល្មើស ខណៈជនជាតិចិនដែលផ្តល់សំណូក រួមនឹងបក្ខពួកផ្សេងទៀតនោះ កំពុងរត់គេចខ្លួន។ គួរជម្រាបថា កម្លាំង​របស់​អង្គភាពប្រឆាំងអំពើពុករលួយជាអ្នកចាប់ខ្លួន មេឃុំព្រែកខ្សាច់ និងបក្ខពួក។

  យោងតាមលិខិតចុះថ្ងៃទី១៨​​ ខែកញ្ញា របស់អយ្យការអមសាលាដំបូង​ មេឃុំ និង​បក្សពួកត្រូវបានចោទប្រកាន់ម្នាក់ៗ៣បទល្មើស។ មេឃុំព្រែកខ្សាច់ក្នុង​ខេត្តកោះកុង គឺ​ លោក រៀម រុំ  ត្រូវ​បាន​តំណាងអយ្យការចោទប្រកាន់ ពីបទស៊ី​សំណូក សមគំនិតក្នុងអំពើរៀបចំ ឬដឹកនាំមជ្ឈមណ្ឌលឆបោកអនឡាញ និងលាងលុយកខ្វក់។ ចំណែក ឈ្មោះ ជា វាសនា និងឈ្មោះ ជា សុទ្ធ ត្រូវបានតំណាងអយ្យការចោទប្រកាន់ពីបទ សមគំនិតក្នុងអំពើស៊ីសំណូក សមគំនិតក្នុងអំពើរៀបចំ ឬដឹកនាំមជ្ឈមណ្ឌលឆបោកអនឡាញ និងសមគំនិតក្នុងអំពើសម្អាតប្រាក់។ តំណាងអយ្យការ​មិនបាន​បញ្ជាក់អំពីតួនាទី ឬមានឋានៈរបស់​បុគ្គលសង្ស័យទាំងពីរនាក់​ខាងលើនេះទេ។

ដោយឡែក ជនជាតិចិនដែលផ្តល់សំណូកឱ្យមេឃុំព្រែកខ្សាច់ក្នុងទឹកប្រាក់ ៨០៥០ដុល្លារ ជាថ្នូរនឹងការជួយរំដោះខ្លួន និងបក្ខពួកមិនឱ្យសមត្ថកិច្ចចាប់ខ្លួនបាន ត្រូវបានតំណាងអយ្យការចោទប្រកាន់ចំនួន ៣បទល្មើស ដូចមេឃុំព្រែកខ្សាច់ លោក រៀម រុំដែរ។ តែយ៉ាងណា ជនជាតិចិនខាងលើដែលមានឈ្មោះថា ចាង ចៀនឈាំង និងបក្ខពួក កំពុងរត់គេចខ្លួន។

នៅរសៀលថ្ងៃទី១៩ ខែកញ្ញានេះ លោក ឈិន រតនៈ អ្នកនាំពាក្យរដ្ឋបាលខេត្តកោះកុងបានអះអាងថា រដ្ឋបាលខេត្តបានទទួលដំណឹងពីអង្គភាពប្រឆាំងអំពើពុករលួយ ទាក់ទង​នឹង​ការចាប់ខ្លួនលោក រៀម រុំ មេឃុំព្រែកខ្សាច់ ស្រុកគិរីសាគរ និង​បុគ្គល ២នាក់ផ្សេងទៀត ម្នាក់ឈ្មោះ ជា វាសនា និងម្នាក់ទៀតឈ្មោះ ជា សុទ្ធ។ ក៏ប៉ុន្តែលោក ឈិន រតនៈអះអាងថា គិតត្រឹមពេលនេះ រដ្ឋបាលខេត្តកោះកុង ​ពុំទាន់ទទួលបានព័ត៌មានអ្វីបន្ថែមឡើយ។

ការឈានដល់ដំណាក់កាលចាប់ខ្លួន និងចោទប្រកាន់ មេឃុំព្រែកខ្សាច់ និងបក្ខពួក២នាក់នោះ គឺធ្វើឡើងក្រោយ អភិបាលស្រុកគិរីសាគរនៅថ្ងៃទី២៧ ខែឧសភា ឆ្នាំ២០២៦ បានចុះបង្ក្រាប និងបិទទីតាំងអនឡាញនៅលើដីរបស់មេឃុំរូបនោះ។ ក៏ប៉ុន្តែសមត្ថកិច្ចពុំអាចចាប់ខ្លួនក្រុមឆបោកអនឡាញណាម្នាក់បានឡើយ ដោយហេតុថា លោក រៀម រុំ និងបក្ខពួកបានជម្លៀសក្រុមឆបោកអនឡាញប្រមាណ ៣០នាក់ឱ្យចេញផុតពីទីតាំងរបស់ខ្លួន។ ជាថ្នូរនឹងការជួយជម្លៀស ក្រុមឆបោកអនឡាញបានផ្តល់ប្រាក់ចំនួន ៨០៥០ដុល្លារ ទៅឱ្យលោកមេឃុំព្រែកខ្សាច់។ នេះបើតាមការបញ្ជាក់​របស់​លោក ឱម យិនទៀង ប្រធានអង្គភាពប្រឆាំងអំពើពុករលួយ ទៅកាន់សារព័ត៌មានក្នុងស្រុក។

គួរជម្រាបថា ក្រោយពីរដ្ឋាភិបាលបើកប្រតិបត្តិការបង្ក្រាបអំពើឆបោកអនឡាញ មន្ត្រីក្នុងជួររដ្ឋាភិបាលទាំងថ្នាក់ជាតិ និងថ្នាក់ក្រោមជាតិមួយចំនួនត្រូវបានចាប់ខ្លួន បន្ទាប់ពីរកឃើញថា បាន​ជាប់ពាក់ព័ន្ធនឹងអំពើឆបោកអនឡាញ។ នៅក្នុងករណីកន្លងមក មន្ត្រីខ្លះបានលួចផ្តល់សន្លឹកទិដ្ឋាការដល់ក្រុមឆបោកអនឡាញ មន្ត្រីខ្លះផ្តល់ទីតាំង ឬជួលដីឱ្យក្រុមឆបោកអនឡាញធ្វើប្រតិបត្តិការ និងមន្ត្រីមួយចំនួនទៀតទទួលសំណូកពីក្រុមឆបោកអនឡាញដើម្បីបិទបាំងព័ត៌មានជាដើម​៕